12‏/02‏/2009

لساك فاكر


لساك على احلامك قادر يا صديق

لسه فى قلبك

ضحكه

وفرحه

وشموع بتضوى للكل طريق

لسه فى قلبك عصفور بيغرد

بيطير

لسه جوه ضلوعك

قلبك بيرفرف

لسه حصانك

على البر بيرمح

بيعافروسط موج البحر المكسور

لسه فى قلبك جزء براح

تحضن فيه الدنيا و تضم

انا عارفه انك قادر تحلم

قادر تعشق

قادر تفرح

قادر تمسك قلمك تكتب حدوته

ماما تحكيها للنونو

يضحك ويغمض و ينام

يحلم فى منامه

باميرة جميله وسلطان

وبساحر يحكى للعابد

وبفارس على ضهر الخيل

شايل سيفه فرحان

بيروح للملك الغندور

لساك فاكر

تمسك قلمك

تسرح لبعيد

مع ضحكه جميله لبنوته

تخطف قلبك

وتعيش فى عنيها حدوته

منسوجه حروفها ومكتوبه

فى محطه قطر

هات الوانك

شخبط على كل جدار

اوعاك تحزن

دانت الفرحه فى عيونك ساكنه

ضحكه صوتك

تحضن وتلم

اوعاك تنسى

خليك فاكر

لسه العمر فراشه

بتفرد جناحتها فى السما هاتطير

لسه القلب صغير

رغم الاحزان بيدق

لسه فى صوتك بحر امان

لساك فاكر

ولا نسيت

وعد بانك تفضل شايل قلبك

حافظ حلمك

ضامم اهلك والخلان

قادر على كل الاحزان

انا عرفاك

رغم ان الحزن بيهد جبال

تقدر تضحك

تقدر تحلم

ماتكنش بخيل

ازرع فى حقول الصمت سنابل

انا عارفه

انك قادرتسبح ضد التيار

قادر تزرع بساتين الدنيا زهور

قلبك سامع صوتي

سامع قلبي

عارف انى واثقه

انك ها تقوم

ها تقول

ها تفرد دراعاتك تحضن قرص الشمس

ها تطول نجوم السما باديك

ايوة انا عارفه

انك تقدر

لازم تقدر

لازم ها تكون

===================

رساله خاصه جدا

===========

هناك 3 تعليقات:

  1. الله يسامحك

    و اضحك عليكى لو قلت مش قادر
    و على نفسى لو قلت قادر

    بس اللى اقدر اوعد بيه انى هحاول

    مش قلتلك بلاش انا فى اللافندر يا مها
    :(

    ردحذف
  2. الله ايوه كده ادينا امل يا ميها اللله عليكي حلوه اوووي اوووي اووووي اووووي وكلنا لسا فاكرين علي فكره يسلم قلمك
    هيه دي

    ردحذف
  3. الله حلوة أوى
    تسلم ايـــــــــدك

    ردحذف