13‏/04‏/2014

فرق توقيت


كل علاقتك بالحياه مجرد فرق توقيت
فرق توقيت هو الوصف الامثل لمكانك فى الحياه او حياة المحيطين بيك
توقيت خطأ دخلت فيه حياتهم
وتوقيت غلط خروجهم
وانت بين الاتنين واقف بتحاول تكتشف امتى يكون التوقيت صح
امتى تقدر تتجاوز عقبات فروق التوقيت بينك وبين العالم
تقتحم الحياه وتقرب منها بقوة
استسلامك غلط ومعافرتك برضه غلط
الاتنين استهلاك لروحك وللطاقه اللى بتحاول تستمر بيها
صعب انك تستسلم
ولأنك مش هتقدر تكون مجرد كائن بيتحرك فى فضاء ما بدون اراده او رغبه
صعب تكون اسير عيون زجاجيه تشوف بيها الدنيا
معافرتك وجع وتعب لانك مش عارف بتعافر لامتى وايه اللى هيكون بعد ما تعافر
كل واحد هياخد طريق ويمشى
الكل بيبتدى فى الوقت اللى انت بتنتهى فيه
فرق توقيت تانى
نغمه نشاز فى لحن مش ليك مكان فيه
كل واحد لحنه متقسم من غيرك
احساسك تايه بين كل الملامح اللى حواليك ,حيرتك قيدت احساسك وجمدت مشاعرك
فقدت الرغبه فى انك تقرب ومش عارف تبعد
خايف من يوم انت عارف انه بيقرب تغيب فيه كل الملامح فى طريقها
وتتلامس عقارب الساعه فى اللحظه صفر
وقت مايكون كل حاجه مكانها فاضى وصوتها مجرد صدى
صعب تقدر تكون قوى فى وقت يكون فيه وجودك هش
جذورك سطحيه
خيالات هلاميه بترقص على جدران بعيده
بيغيب الناس
ويغيب الضى
وتتلاشى الخيالات
تتحول لاشباح باهته ,من غير ملامح
تقرب منها من غير خوف تلمس كفوفها
تمسك فيها بتدور فيها على الونس
حاول تتعود عليها ,بلاش تخاف منها ,اخلق منها ارواح مختلفه,علمها تسمع صوتك
تفهم صمتك
ترد عليك واسمع صوتها
ردد صوتك
غنى معاها وليها
ارسم جنبها بيت
ازرع شجرة يمكن يوم تكبر
جرب تصاحبها