03‏/11‏/2008

وتعلمت فن البوح

منذ ان اخذت بيدى لنتريض فى حدائق طفولتك
وسرنا معا فى بستان صباك
وتظللت باشجار رجولتك
ادمنت هذا الهواء النقى
الذى جائنى من حياتك ليملئ حياتى
اعتادت رئتاى على عبيرك وعطرك
اعلم جيدا بانك لست ملاكا
تحمل بين ضلوعك الكثير من النزوات والاخطاء
ولكنك معى
اخترت ان تكون بلا اخطاء
استطعت ان تحتوينى
جعلتنى دون ان اشعر او اتعمد
افتح لك كل مسام قلبى
واجلس بين يديك استمع لك
وانت تحكى وتحكى
وكانك كنت تدخر الكلام تيقوله لى
معا لم نكن نعرف كم من الوقت قد مضى
ولا كم من الوقت متبقى
دوما كان بيننا حديث لاينقطع
ابدا
احكى ويحكى
كلانا كان يستمتع بحكايا الاخر
عندما احتجتك انت لتشاركنى فرحى
وافتقدت وجودك
وانا اواجه ازماتى
عندما بكيت فلم ارى الا صورتك امامى
عندما مرت بى مشكله
فقفز اسمك امامى ينادينى
ايقنت وقتها
بانك الرجل الوحيد
الذى اشعر باليتم بدونه
ماكان بيننا كان بوح بلا حدود
انفتاح لكل مسام القلب والعقل
بلا شروط
يوما ما سالنى احدهم
اليس البوح احدى سمات الحب
اخبرته ضاحكه
ان الصداقه تنتمى لسلاله الحب
ولكنه حب مميز
حب يستطيع ان يحتوى لحظات الضعف
والدموع بلا خجل
حب لا يخجل من البكاء والتمرد
والاعتراض
حب لا يخجل من الاعتذار والندم والاسف
حب لا تتوقف فيه الكلمات
فالصداقه ولدت من رحم الحب
فى لحظه صدق
======================
Sunday, October 5, 2008 at 11:13pm

هناك 23 تعليقًا:

  1. Amira Abdalla (Egypt) wrote
    at 11:24pm on October 5th, 2008
    للاسف لا يفهمون صداقتنا ويشغلهم قدر انوثتنا التي نبذل مجهودا لنخفيها فيبذلوا مجهود مضاعف لاكتشافها - للاسف يامها معظهم لا يفهمون صداقتنا ويلعبون معا باسم الصداقه دور العاشق المتيم بلا التزام حتي ولو سآلته تحبني قال لك نحن اصدقاء وان نحيت يده الساخنه من فوق كتفك وابعدتيه برقه عن جسدك اللذي يحاول اقتناص لمسته غضب وعاتبك النسا اصدقاء .. للاسف يامها لايفهمون صداقتنا الا من باب الغرام السري كآن البوح بغرامنا خطيئه ينفوها عن انفسهم ويتطهروا من دنسها باكاذيب الصداقه التي لا يشعروا بقيمتها فعلا - اسفه يامها - كان نفسي اتفق معاك زي كل مره لكن هذه المره لا اوافقك واحسك - للاسف مازلت مخدوعه - بسحر لم تنفك كل طلاسمه التي اسرت نفسك والهبت خيالك المبدع فكتب لنا ماكتبه - اسفه يامها

    ردحذف
  2. Noha Essmat wrote
    at 11:36pm on October 5th, 2008
    "وتنمو بيننا ياطفل الرياح
    تلك الألفة الجائعة
    وذلك الشعور الكثيف الحاد
    الذى لا أجد له اسماً
    ومن بعض أسمائه الحب"

    انتى بقى يامها النوت بتاعتك دى ترجمت الكلام اللى فات ده
    فعلا الصداقة ولدت من رحم الحب
    ومع ذلك الحب معنى أضيق بكتير من معنى الصداقة
    الصداقة هى الونس... هى الألفة .. هى حب بلا شروط... عشق بلا وجع

    هقوللك ايه تانى يامها... منك لله ياحرامية:)هههههههههههههه

    ردحذف
  3. Noha Essmat wrote
    at 11:39pm on October 5th, 2008
    أميرة بقى أقوللك اييييه
    هى فعلا مها أسيرة سحر لم تنفك كل طلاسمه بعد

    ماهو يامرمر اللى حضر العفريت هو اللى يصرفه
    وغالبا مش هى اللى كانت محضرة العفريت
    العفريت هو اللى حضر نفسه

    "فإن من أشعل النيران يطفئها
    وإن من بدأ المأساة ينهيها"

    ردحذف
  4. Maha El-Abbasi wrote
    at 11:46pm on October 5th, 2008

    ههههههههههههههههههه
    منك لله يانهى عصمت جدا
    بجد مش عارفه اقولك ايه
    =======================
    اميرة
    مش عارفه ازاى تكونى اول واحدة ايدتنى عندما قلت صديقى بحبك ودلوقتى مختلفين
    لا بجد موجود الصديق دة موجود الرجل الذى ينظر لكى دون اشتهاء
    موجود الرجل الذى اذا ماوضع يدة على كتفك فهو ليحميكى ولا تشعرى الا بلمسه حانيه
    لا تشعرى ابدا بتلك السخونه المنفره
    حتى وان كان نادر الوجود لكنه موجود من الممكن ان يمضى العمر ولا نلقاه ولكن هذا لا يعنى انه ليس موجود

    ردحذف
  5. Amira Abdalla (Egypt) wrote
    at 11:52pm on October 5th, 2008
    بصي يامها - مافيش تناقض بين رايي الاولاني ورايي ده - صديقي بحبك اه - صديقي اتمني حبي اه - صديقي اتمني فهمك اه - لكن للاسف صديقي هل تفهمني هل تحس بي هل تعرف مااشعر به بحق - مانيش متآكده - هي دي المعضله يامها

    ردحذف
  6. Maha El-Abbasi wrote
    at 12:02am on October 6th, 2008
    ندرة الوجود لا تنفى التواجد
    انا مقتنعه انه من النادر تواجد هذا الرجل ومن الممكن ان يمضى العمر ولا نلقاه
    ولكنه موجود ومن الممكن ان تلتقى معه
    وتتاكدى جيدا من صدق مشاعره
    فبداخل كل امرأ ة بوصله تجيد التقاط الاشارات الخاطئه

    ردحذف
  7. Amira Abdalla (Egypt) wrote
    at 12:05am on October 6th, 2008
    وتجيد ايضا التقاط الاشارات الصحيحه ياست فنانه هانم

    ردحذف
  8. Maha El-Abbasi wrote
    at 12:20am on October 6th, 2008
    طيب ماهو الراجل ماارسلش اى اشارات
    الراجل كان انسان بجد
    اعمل انا ايه طيب
    ههههههههههههههههههههههههههه

    ردحذف
  9. Naglaa Elabassiry (Jonesboro, AR) wrote
    at 1:14am on October 6th, 2008
    يا جماعة انتوا بتتكلموا فى موضوع واجع قلبى
    بس الاول تحياتى يا مها يا كتلة الاحسايس الجميلة
    فالصداقه ولدت من رحم الحب فى لحظه صدق
    كتباتك بتلمسنى جدا وبحس ان كلامك طالع منى انا

    اميرة اسمحيلى انا وقفت كتير جدا قدام كلامك
    صديقي بحبك اه - صديقي اتمني حبي اه - صديقي اتمني فهمك اه - لكن للاسف صديقي هل تفهمني هل تحس بي هل تعرف مااشعر به بحق
    انا معاكى
    مع ان الحكم عمره ما كان مطلق
    بس فعلا ده بيحصل كتير وبيصدمنا كتير اوى
    لما يتقالك فى اخر المشوار
    وايه اللى يستدعى كل ده الا اذا كان اللى بينا حب مش صداقة
    يعنى من الاخر انا كنت واخدك على قد عقلك من الاول بس فوقى صداقة ايه اللى يبقى فيها كل ده

    ردحذف
  10. Mohammad Hwehy wrote
    at 2:05am on October 6th, 2008
    أ.أميره .. أ.نجلاء

    معلش بقي انا اللي وقفت كتير بين كلامكوا بقيت رايح جي في التعليقات يا عيني متشحطط
    اصل فعلا ما فيش تناقض بين اني اقول صديقي احبك وفي نفس الوقت يكون هو غير قدير بهذا الحب الصدوقي ولا الصدق الحبوبي - اللي صح فيهم مشوها وخلاص- طب اومال انا كنت متشحطط ليه بين التعليقات
    بصراحه سبب الشحططه دي هو انتوا .. .. اصل مش دايما الجل ذئب يبذل مجهود مضاعف لازهار ما تخفيه المراه التي لايشترط ان تكون دوما حملا دويعاً

    أعتقد ان امراه بالذكاء بان تقول صديقي احبك .. هي امراه جديره بهذه الصداقه
    وسيقف الذئب امامها حملا وديعاً مشدوها ومندوها وملبوسا بتلك الصداقه .. خائفا ان يفقدها فهو اخيرا تعلم فن البوح

    ردحذف
  11. Mohammad Hwehy wrote
    at 2:08am on October 6th, 2008
    ورد ان هناك اخطاء املائيه توديني استخبي خجلا

    وخجلا طبعا لن احذف التعليق او اكتب تصحيح عشان استاهل التريقه حتي ولو كانت في سركوا
    بس بالراحه والنبي

    ردحذف
  12. Maha El-Abbasi wrote
    at 2:14am on October 6th, 2008
    .. خائفا ان يفقدها فهو اخيرا تعلم فن البوح
    ===============================
    بجد انا الى هاصقف ليك من هنا لبكرة
    هى دى يامحمد
    هى دى بجد
    يخرب عقلك جبتها بجد
    ايوه هى دى فعلا
    صح كدة
    ================================
    وسيقف الذئب امامها حملا وديعاً مشدوها ومندوها وملبوسا بتلك الصداقه .. خائفا ان يفقدها فهو اخيرا تعلم فن البوح
    ========================
    انت بقى بجد الى خطفتنى دلوقتى والدور عليا انى اقولك
    منك لله
    صح
    صح جدا وقوى كمان
    حتى لو هو نمشيها اندل راجل فى العالم هايكون معايا انا ملاك ومن غير مايمثل
    ومش هايصطنع النقاء لا هايكون كدة بجد وحق وحقيقى

    ============================
    Maha El-Abbasi wrote
    at 2:15am on October 6th, 2008
    تمسح ايه دانا اقتلك لو مسحته

    ردحذف
  13. Mohammad Hwehy wrote
    at 2:21am on October 6th, 2008
    يا نهار ابيض علي الاكسجين لما يملي الفراغ الجواني اللي اتملي اساسا من الفرحه بكلمتينك دول يا مها .. بس مش جامد كده احسن الغرور يصيبني في مقتل
    وتبقي انت السبب وكلامك الحلو ده

    ردحذف
  14. Naglaa Elabassiry (Jonesboro, AR) wrote
    at 2:34am on October 6th, 2008
    تمسح ايه خليك هنا خليك بلاش تفارق
    بس تعرف بقى انه ممكن يعمل كده برضه حتى بعد ما تعلم فن البوح

    ردحذف
  15. Mohammad Hwehy wrote
    at 2:45am on October 6th, 2008
    لو صداقه بحق واستاهلت ان الصديق تتجرد من الخوف اللي بغلفا بيه المجتمع
    عشان تقوله صديقي احبك .. يبقي ما اعتقدش

    بس لو حصل يبقي اولا هي معندهاش الذكاء اللي قلنا عليه واللي بيه تقدر تفرق بين الصديق والذئب
    يبقي انا بصراحه ما احبش اعيش وسط دنيا فيها كل الكم ده من الخداع والجهل
    بس هاعيش .. ليه؟ .. لان طول ما احنا عايشين لازم نحاول نتغير .. .. .. وها نقدر

    معلش بقي انا رغاي وبحب اتكلم كتير
    هههههههههههه

    ردحذف
  16. Rabab Fayed wrote
    at 3:30am on October 6th, 2008
    بجد انا مهما اعلق مش هقدر اقول اللى قالته اميره او نهى او حويحى ونجلاء بجد كلامك جميل زى كلام مها
    تسلم ايدك يامها ومشاعرك واحساسك انت حد جميل اوووى وجواكى مشاعر حلوه اووووى و كلام جميل اوووى
    ربنا يخليكى لينا وتكتبى لينا احلى كلام يمس القلب
    بحبك يامها وبحب كلامك الجميل ده

    ردحذف
  17. Noony Adel (Egypt) wrote
    at 8:35am on October 6th, 2008
    الله عليكي يا مها .. الله

    ردحذف
  18. Kholoud ElSayed (Egypt) wrote
    at 10:59am on October 7th, 2008
    انت بقيتى خطر على الأمن

    تحية للموضوع الأكثر من رائع
    وللمناقشات والتعليقات

    ردحذف
  19. Rose Sabet (Egypt) wrote
    at 1:03pm on October 7th, 2008
    استطاع ان يحتوينى
    جعلنى دون ان اشعر او اتعمد
    افتح له كل مسام قلبى
    واجلس بين يديه استمع له وهو يحكى ويحكى
    وكانه كان يدخر الكلام ليقوله لى

    ده انتي وصفتي الاحتواء بالاحتلال
    في منتهي الجمال عرفتي ترسمي صورة حلوة اوي بكلمات بسيطة

    ردحذف
  20. Noha El-arabi (Egypt) wrote
    at 3:55pm on October 6th, 2008
    الجميلة مها
    فكرتيني بقصيدة كن صديقي
    المعاني رائعة في قراءتها
    اكثر روعة لو وجدت
    لكن انا لا اصدق مثل وجود هذا الصديق
    و ان اكتشفت صدق حدسي لن يكون غباءا منها في الاختيار
    او كذبا منه او اي شئ من هذا القبيل
    لكنه الواقع يا صديقتي
    الواقع و الطبيعة

    ردحذف
  21. Maha El-Abbasi wrote
    at 5:20pm on October 6th, 2008
    لا معلش يانهى الموضوع ملوش اى علاقه بكن صديقى
    ياجماعه ياريت نشوف الموضوع من منظار الصداقه المجردة من خانه البطاقه انا بجد كدة حسيت ان الموضوع اثبات هويه
    اعتقد كمان ان مش الرجل بس الى ممكن يكون بيفكر فى المرأه ابعد من الصداقه طيب ماهو ممكن بردة ان المرأه تستغل الصداقه للوصول لرجل
    ممكن اكون انا سعيدة الحظ انى عشت التجربه دى
    والتقيت بهذا الرجل الصديق مرتين فى حياتى
    حتى وان كان الفرق بينهم سنوات كثيرة الا ان هذا اثبات كافى ان هذا الرجل موجود
    وارفع له تحياتى
    واقدم حبى واحترامى لكلا الصديقين فلقد اثبت كلام كل من كتب هنا انهم عمله نادرة
    فكم انا محظوظه بكما فى حياتى

    ردحذف
  22. عبد الرحمن14 يونيو 2009 2:48 م

    أهو احنا دلوقتى ادام مشكلة موروث شعبى جاهلى هيفضل ملازم المجتمعات الشرقيه لحد يوم القيامه المغرب
    الموروث اللى صمم يصور الانثى فى شكل حمل و الرجل فى صورة ذئب
    اللى أصر ان العلاقه بين الاتنين لازم يكون فيها شهوانيه و بهيميه و افكار ابليسيه لو متترجمتش لافعال كفايه وجودها كأفكار علشان تنفى و بشده فكرة وجود علاقه صداقه بين الاتنين

    صحيح يمكن الراجل ده نادر وجوده بس مش مستحيل
    الحاسه السادسه و السابعه و الخامسه و العرشون للمراه بتقدر تكشتفه

    لو سيبنا التصور زى ماهو حمل و ذئب
    و ضيفنا ليه تصور حويحى عن الحمل اللى وقف مشدوها أمام تلك الصداقه
    يبقى النتيجه اللى عندنا حاله زى حالة الاميره و الوحش

    الحمل اللى قدر يلاقى ذئب يحبه و يحميه من الذئاب اللى متأثروش بالصداقه و موقفوش مشدوهين
    و فى نفس الوقت يفهمه و يقدر يعلمه ازاى يبقى ذئب وقت الجد

    ليه مصممين تصورو الراجل انه مجرد شهوه و عنف و افكار سفليه
    مش هو ده الطفل اللى حملتوه و فصلتوه تلاثون حولا

    !!!!

    ردحذف
  23. اولا انا عن نفسى مقتنعه مليون فى الميه ان مش اى راجل بيكون صديق لان مش اى واحد بيقدر يفهم ويستوعب الصداقه دى والحب الكبير اللى بيكون موجود بين الطرفين
    بس موجود بالعكس اعتقد انه لما يكون نادر بيكون قيمته اكبر لما تلاقيه
    والمشكله مش فى الراجل بس
    فى كتير برضه بتتفهم غلط من الطرف التانى واى اهتمام من راجل بيتفسر انه اعجاب
    مافيش حاجه مطلقه
    بس الاكيد ان الراجل دا لما بيتوجد فى حياة اى واحدة بيكون اوفى الاصدقاء وبيحافظ عليها جدا وبيكون هديه ربنا ليها لانه بيكون الاخ والصديق والاب والابن
    بيكون الامان اللى من غير خوف
    الحب من غير تمن ولا سبب ولا حساب
    بيكون احساس شفاف جميل بيربط الاتنين لاخر العمر

    ردحذف